Nəriman müəllimi savadlı mühəndis, təcrübəli rəhbər işçi, əsl azərbaycanlı kişisi və elə, vətənə bağlı bir mütəxəssis kimi görüb-tanımışam. Sadəliyi, səmimiliyi və bir də diqqətçiliyi ilə həmyaşıdları və həmkarları arasında seçilirdi

Cahangir Qocayev

Mən Nəriman İsayevi sanballı, həmişə əməyə bağlı rəhbər işçi kimi görüb tanımışam. Xoşagəl-məyən, arzuedilməyən sifətlər Nəriman müəllimin xarakterinə uyğun deyildir. Həmişə faktlara əsasən öz fikrini əsaslandırardı.

Nəcəf Hacıyev

Azərbaycan tikinti kompleksinin iş ustadlarından söz düşəndə öncə Nəriman İsayevi yadıma salıram. Həqiqətən Nəriman Ağaxan oğlu ölkə tikinti kompleksində çox faydalı işlər görmüşdür.

Saleh Hacıyev

Baş idarəmizin rəisi isə Nəriman İsayev idi. O, çox obyektiv, işgüzar, vətənpərvər insan idi. Eyni zamanda, çox zəhmli, lakin çox isti qəlbə malik adam idi.

Telman Kazımov

Mən əvvəlcədən deyim ki, Nəriman İsayev kimi kamil bir şəxsiyyətin nazir işlədiyi vaxtlarda şifer kombinatında rəhbər vəzifədə işlədiyimə görə çox məmnunam. Çünki Nəriman İsayevdən çox şey öyrənmişəm.

Telman Səfərov

İnsana, tabeçiliyində işləyənlərə, xüsusilə gənclərə necə qayğı və diqqət yetirməyi Nəriman müəllim bizə öyrətdi, özünün əməli işi ilə başa saldı. O, bir mənim yox, bizim sistemdə çalışanların hamısının həyat müəllimi idi.

Şamil Musayev

Nəriman müəllim aramızda olmasa da, daim onun yeri görünür. Axı yaxşı olanlar heç vaxt unudulmur, sonrakı həyat cığırlarında qarşımıza çıxanların hamısını biz onlarla müqayisə edir, yaxşıları ehtiramla yad edirik.

Telman Orucov

Mən Nəriman İsayevi çox təvazökar bir insan kimi tanımışam. O, öz işini həmişə düzgün qiymətləndirər, gördüyü işin şişirdilməsinə imkan verməzdi. Eyni zamanda, başqalarının işinə xor baxmazdı.

Sahib Rəhimov

Heyf ki, biz çox da uzun müddət bir yerdə işləyə bilmədik. Cəmi iki il bir yerdə işlədik. Bu iki ildə Nəriman müəllimi elə tanıdım ki...

İbrahim Abdullayev

Nəriman müəllim ideyalı, əqidəcə saf, ürəyi təmiz bir insan idi. Mən onun xətrini dünyalar qədər istəyirdim.

Qaraş Əfəndiyev

Mən hələ orta məktəbdə oxuyandan Nəriman İsayevlə tanış idim. Ali təhsili birgə başa vurduq. Harada və nə vəzifədə işlədimsə, həmişə Nəriman müəllimlə əlaqə saxlardım.

Sabir Ağayev

Mən Nəriman İsayevi hələ tələbəlik illərindən tanıyıram. O, çox savadlı, hərtərəfli yetişmiş bir kadr idi. Onda olan səbir, təmkinlik və bir də adamlarla ünsiyyət tapmaq bacarığı olduqca yüksək idi.

Cəlal Mənsimov

Əməksevərlik və çeviklik, mərdlik və yorulmazlıq kimi yüksək əxlaqi keyfiyyətlərdən söz düşəndə, mən bu gün də ilk öndə Nəriman İsayevin adını çəkirəm.

Qurban Soltanov

Nəriman İsayevin dediyi qayda ilə daş karxanasına pul köçürdük, məktub yazdıq, daha kimsə Bakıya daş üçün gəlib-getmədi. Bax, Nəriman müəllim belə şəxsiyyət kimi yaddaşımda həkk olmuşdur.

Şamama Həsənova

Nəriman müəllim harada və nə vəzifədə işləyibsə, həmişə tikmək, qurmaq və abadlaşdırmağa ciddi fikir vermişdir.

Əlipaşa Axundov

Nəriman İsayev çox dəyanətli və ləyaqətli adamdır. Mən onunla tanışlığımdan çox razı qaldım.

Məhəmməd Ağamirzəyev

O, heç zaman istər yerli və ya yersiz mübahisələrə yol verməzdi. Bir qayda olaraq ünsiyyət saxladığı, əlaqədə olduğu vəzifəli şəxslərə başa salardı ki, hər şeyi qanunu yolla, dövlətçiliyimizi pozmadan əməl edək.

Bəşarət Paşayev

Əvvəlcədən deyim ki, Nəriman İsayev mənim həyat müəllimim olmuşdur. Mən özüm bu gün el ağsaqqalı, təqaüdçü olduğum vaxtda, Nəriman müəllimi öz ustadım hesab edirəm.

Kamil Xudiyev

Nəriman İsayev kadr seçməkdə səhvə yol verməzdi. Mən həmişə Nəriman müəllimi ağıllı, sadə, mehriban insan kimi tanımış, onu yüksək səviyyəli, səriştəli, fəaliyyətli rəhbər işçi kimi tanımışam.

Ənvər Əliyev

Nəriman İsayev elə bir dövlət işçisi idi ki, o, həmişə və hər yerdə dövlət tapşırıqlarının, qəbul olunmuş qərar və sərəncamların yerinə yetirilməsinə ciddi fikir verərdi. O, intizamı sevən, obyektiv rəhbər işçi idi.

Kamil Məmmədov

Mən onu müxtəlif rəhbər vəzifələrdə çalışdığı illərdə görmüşəm. Tələbkarlığı ilə yanaşı, xeyirxahlığı da vardı. Heç zaman ədalətsizliyə yol verməzdi, haqq, ədalət, insaf və mürüvvət qanı Nəriman İsayevin canına hopmuşdu...

Şair Həsənov

Nəriman İsayevi lap yaxından tanıyan bir adam kimi deməliyəm ki, o hərtərəfli yetişmiş, böyük bir şəxsiyyət idi. Onun şəxsiyyət olması dürüst olmasında, sözübütövlüyündə və bir də səmimiyyətliyində büruzə verirdi.

Dadaş Asanov

İnsandan həyatda yadigar olaraq xoş xatirələr, xeyirxah əməllər və bir də əl izləri qalır. Belə insanlardan biri də Nəriman Ağaxan oğlu İsayevdir...

Bəhram Məhəmməd oğlu İbrahimov

Mən hesab edirəm ki, həmkarım, dostum olan Nəriman Ağaxan oğlu İsayev həyatın enişli-yoxuşlu yollarında çox şey görmüş, çox sınaqdan çıxmış, məhrumiyyətin acısını dadsa da, sevindiyi günlər daha çox olmuşdur.

Ağasəf Əliyev

Nəriman müəllim çoxlarının edə bilmədiyini edə bilirdi. Məsələn, o, özünə kənardan baxmağı bacarırdı. Kənardan özünə baxanda yaxşı cəhətləri saxlardı, pis cəhətləri görə bilən kimi dərhal onu kənara atmağı bacarırdı.

Vahid Hacıyev

Böyük rus xalqının görkəmli ədibi L.Tolstoy yazmışdır: "Yaxşı iş hər şeyi məğlub edir və özü heç vaxt məğlub olmur". Sanki bu sözlər Nəriman müəllimə aiddir. Nəriman müəllim heç zaman məğlub olmamışdır.

Atakişi Quliyev

Nəriman İsayev milli adət və ənənələrimizin də, ana dilimizin də, azərbaycanşünaslığın təəssübkeşi, hamisi kimi də onu tanıyanlar arasında hörmət və ehtiram qazanmışdır.

Yusif Nağıyev

Nəriman İsayev elin, obanın, bütövlükdə Azərbaycanın böyük oğlu idi. O, mənalı keçirdiyi ömür yolunda yorulmazlığı, məhsuldar fəaliyyəti, nəfsini cilovlamaq bacarığı, sözübütövlüyü ilə özünü tanıtmış və sevdirmişdir.

Bəhram İbrahimov

Mən işdə, istehsalatda Nəriman İsayevi güclü bir mütəxəssis, məsul rəhbər və yüksək mənəvi keyfiyyətlərə malik dəqiq insan, səmimi dost və həmkar kimi görüb tanımışam. Həmişə onu inamlı, pak niyyətli, hər an ünvanını və nüfuzunu gözləyən əsl kişi kimi görmüşəm.

Saday Quliyev

Nəriman müəllim həm də sədaqətli dost, səmimi yoldaş, mehriban insan idi. O, çox diqqətcil şəxsiyyət idi.

Hüseyn Qasımov