O, intizamı sevən, obyektiv rəhbər işçi idi

Kamil Məmmədov

sabiq yeyinti sənayesi naziri

Kamil Seyid oğlu Məmmədov 1931-ci ildə Qəbələ rayonunda anadan olmuşdur. 1956-cı ildə Leninqrad Texnologiya İnstitutunun mexanika fakültəsini fərqlənmə diplomu ilə bitirmişdir. Ərzaq Məhsulları Sənayesi Nazirliyində, Bakı Biskvit fabrikində, Respublika Nazirlər Sovetində şöbə müdirinin müavini, Ət-süd Sənayesi Nazirliyində, Yeyinti Sənayesi Nazirliyində məsul vəzifələrdə işləmiş, yeyinti sənaye naziri olmuş, Aqrar Sənayesi Komitəsi sədrinin birinci müavini və respublika naziri, Taxıl Məhsulları Dövlət Şirkətinin prezidenti vəzifələrində işləmişdir. Respublikanın əməkdar mühəndisidir. Dəfələrlə Ali Sovetə deputat seçilmişdir. Hazırda təqaüdçüdür.

“Nəriman Ağaxan oğlu İsayev haqqında xatirələri danışmaq istəyəndə gözlərim qarşısında ötən əsrin 70-80-ci illərində ölkəmizdə aqrar sahədə aparılan nəhəng işlər canlandı. Həmin işlərin uğurla görülüb başa çatdırılmasında çox məsul və rəhbər işlərdə çalışmış Nəriman müəllimin xüsusi əməyi danılmazdır.

Nəriman İsayev elə bir dövlət işçisi idi ki, o, həmişə və hər yerdə dövlət tapşırıqlarının, qəbul olunmuş qərar və sərəncamların yerinə yetirilməsinə ciddi fikir verərdi.

Nəriman müəllim intizamı sevən, obyektiv rəhbər işçi idi. O, tabeçiliyində işləyənlərin qayğısına qalmağı, tikinti kompleksində uğurla işləməyi bacaran mütəxəssis və rəhbər işçi olmuş və özünün mərifəti, ləyaqəti ilə bu gün də hamımızın qəlbində yaşayır”.